Hārata Day

Kaiwhakangungu Ngaiotanga

Whakatauāki
Ka warea te ware
Ka area te te rangatira
Hongihongi te wheiwheiā
Hongihongi te manehurangi
Kei ahau te rangatiratanga

Pepehā
Ko Taiarahia taku maunga
Ko Ohinemataroa taku awa
Ko Mataatua taku waka
Ko Te Rewarewa taku marae
Ko Te Mahurehure taku hapū
Ko Tūhoe taku iwi

E ngā pītau whakareia o ngā waka maha o te mātauranga huri noa i te motu, e ngā kokonga kainga o ō koutou iwi, tēnā koutou, tēnā koutou, tēnā rā koutou katoa. He uri a Hārata nō ngā hapu, nō ngā marae maha o Ngai Tūhoe. Ko tōna reo, ko tōna ahurea, tōna ohooho, tōna māpihi maurea anō hoki.

I whiwhi a Harata i tana BMEd mai i te Whare Wānanga o Awanuiārangi i te tau 2000. Kua toru tekau tau a Harata e mahi ana i roto i te ao mātauranga. Kua kitea, kua rongonuitia ōna pūkenga ako, whakamāherehere, aromatawai, āwhina kaiako huri noa i te motu i roto i ngā kura Aho Matua, Kura ā-Iwi, kura auraki anō hoki. Tekau mā rua tau ia i roto i te Mana Tohu Mātauranga o Aotearoa e mahi ana hei Kaitakawaenga āwhina i ngā kura ki te whakamahi i ngā tukanga aromatawai paerewa paetae ā-motu. Toru tau ia e mahi ana ma te Roopu Āwhina Kura o te Whare Wananga o Waikato.

Ka huri te tai, ka rerekē te āhua o te whakangungu kaiako, nō reira ka whakatūhia e Harata tāna ake pākihi hei āwhina i ngā kura huri noa, huri noa. Kua mahi ia i raro i te maru whakangungu kaiako o Te Whare Wānanga o Awanuiārangi, ā, inaianei kei raro i te maru whakangungu kaiako o Evaluation Associates. Atu i tērā kei te whakahaere tonu ia i ētahi atu kirimana kei raro i te Tāhūhū o te Matauranga.

Ko ana pūkenga kei roto i te:

  • Aromatawai

  • Whakaū Kounga Aromatawai

  • NCEA

  • Tautoko Tūmuaki me tana ohu kaiako

  • Mātauranga Māori

  • Marau ā-Kura

  • Te Aho Arataki me Te Marautanga o Aotearoa

Tūwhitia te hopo, mairangatia te angitū